પેટ્રોલના આસમાનને અડતા ભાવને કારણે સામાન્ય લોકો હવે ઈલેક્ટ્રીકથી ચાલતા વાહનોમાં ઉંડો રસ લઈ રહ્યા છે. આને કારણે, ઘણા ઓટો ઉત્પાદકોએ તાજેતરના સમયમાં ટુ વ્હીલર સેગમેન્ટમાં તેમના નવા ઇલેક્ટ્રિક સ્કૂટર લોન્ચ કર્યા છે. એટલું જ નહીં, બજારમાં પહેલેથી જ ઘણા ઇલેક્ટ્રિક સ્કૂટર છે. હાલમાં, ઇલેક્ટ્રિક સ્કૂટરની કિંમતો થોડી વધારે હોઈ શકે છે. પરંતુ તેમને ચલાવવાનો ખર્ચ ઘણો ઓછો છે અને લાંબા ગાળે તેઓ પેટ્રોલ એન્જિન સ્કૂટર કરતા ઘણા સસ્તા સાબિત થાય છે. જો કે, જેમની પાસે પહેલેથી જ ટુ વ્હીલર છે, તેમના મનમાં આ વિચાર ચોક્કસપણે આવે કે જો તેઓ તેમના હાલના પેટ્રોલ એન્જિન સ્કૂટરને ઇલેક્ટ્રિકમાં બદલી શકે તો ઘણા પૈસાની બચત થઈ જાય. તો આવા ગ્રાહકો માટે સારા સમાચાર છે.
બેંગ્લોરની કેટલીક સ્ટાર્ટઅપ કંપનીઓએ આવી અનોખી પહેલ શરૂ કરી છે. આ કંપનીઓ તમારા પેટ્રોલ એન્જિનવાળા કોઈપણ જૂના સ્કૂટરને ઇલેક્ટ્રિક સ્કૂટરમાં બદલી આપશે. આ માટે તમારે વધારે પૈસા ખર્ચવા પડશે નહીં. એટલું જ નહીં, એક કંપની તમારા હાલના સ્કૂટરને હાઇબ્રિડ સ્કૂટરમાં રૂપાંતરિત કરવાનો વિકલ્પ પણ આપી રહી છે.
બેંગ્લોરમાં રાઈડ શેરિંગ સર્વિસ પૂરી પાડતી સ્ટાર્ટઅપ કંપની બાઉન્સે આવો જ એક જબરદસ્ત પ્લાન શરૂ કર્યો છે. કંપની કોઈપણ જૂના સ્કૂટરને ઈન્ટરનલ કમ્બશન એન્જિન (ICE) સાથે ઈલેક્ટ્રિક મોટર અને બેટરી ફિટ કરીને ઈલેક્ટ્રિક સ્કૂટરમાં ફેરવે છે. મીડિયા રિપોર્ટ્સ અનુસાર, કંપની આ સેવા માટે માત્ર 20,000 રૂપિયા લે છે.
રિપોર્ટ અનુસાર, કંપની જૂના સ્કૂટરમાં રેટ્રોફિટ કન્વર્ઝન કીટ લગાવે છે. તેમાં ઇલેક્ટ્રિક મોટર અને બેટરી પેકનો સમાવેશ થાય છે. સ્ટાર્ટઅપ કંપની બાઉન્સના સહ-સ્થાપક વિવેકાનંદ હાલેકેરે જણાવ્યું હતું કે કંપનીએ શરૂઆતના રૂપે જૂના સ્કૂટરને ઇલેક્ટ્રિક સ્કૂટરમાં રૂપાંતરિત કરવાનું શરૂ કર્યું હતું. પરંતુ તેમને ટૂંક સમયમાં જ સમજાયું કે પેટ્રોલ એન્જિન સ્કૂટરને ઇલેક્ટ્રિક સ્કૂટરમાં બદલવાની માંગ ખુબજ વધતા આ એક વિશાળ બજાર બની શકે છે.
બાઉન્સ કંપની અનુસાર, તેઓએ અત્યાર સુધીમાં 1000 થી વધુ જૂના સ્કૂટરને ઇલેક્ટ્રિક સ્કૂટરમાં બદલ્યા છે. કંપની તેના કન્વટ કરેલા સ્કૂટર માટે સર્વિસ સેન્ટર ખોલવાની યોજના પર પણ કામ કરી રહી છે. તેમણે કહ્યું કે આવા ઇલેક્ટ્રિક સ્કૂટરમાં બેટરી કીટ એકવાર તેના સ્થાને ફિટ થાય અને એકવાર સંપૂર્ણ ચાર્જ થઈ જાય પછી સ્કૂટર 65 કિમી સુધીનું અંતર કાપી શકે છે. તેમણે કહ્યું કે આ કીટ ઓટોમોટિવ રિસર્ચ એસોસિએશન ઓફ ઇન્ડિયા દ્વારા પ્રમાણિત છે.
જૂના સ્કૂટરને ઇલેક્ટ્રિક સ્કૂટરમાં રૂપાંતરિત કરવાના ફાયદા જોઈને, ડિમાન્ડ વધી ગયા પછી, ઘણી કંપનીઓ હવે આ ક્ષેત્રમાં પ્રવેશી છે. Etrio અને Meladath Autocomponent જેવી કંપનીઓ એવી કીટ લઈને આવી છે જે જૂના સ્કૂટરને ઇલેક્ટ્રિકમાં કન્વર્ટ કરી શકે છે. પેટ્રોલના વધતા ભાવ ધીમે ધીમે ઈલેક્ટ્રીક સંચાલિત વાહનો તરફ વિશ્વને લઈ જઈ રહ્યા છે. તાજેતરમાં, ઓલા ઇલેક્ટ્રિક અને સિમ્પલ એનર્જી એ તેમના ઇલેક્ટ્રિક સ્કૂટર લોન્ચ કર્યા છે. જ્યારે વાહન ઉત્પાદકો આથર, બજાજ ઓટો અને ટીવીએસ પહેલાથી જ ઘણા ઇ-સ્કૂટર વેચી રહ્યા છે.
તમને જણાવી દઈએ કે Meladath આવી Ezee હાઇબ્રિડ કીટ લાવવાની તૈયારી કરી રહી છે જે કોઈપણ જૂના પેટ્રોલ સ્કૂટરને ઇલેક્ટ્રિક હાઇબ્રિડ સ્કૂટરમાં બદલી શકે છે. એટલે કે, આ સ્કૂટર પેટ્રોલ અને બેટરીના કોઈપણ મોડ પર ચલાવી શકાય છે. જો બેટરી ચાર્જ સમાપ્ત થઈ ગઈ હોય, તો તેને ચિંતા કર્યા વગર પેટ્રોલ પર પણ ચલાવી શકાય છે. રિપોર્ટ અનુસાર, જૂના પેટ્રોલ સ્કૂટરને હાઇબ્રિડ સ્કૂટરમાં રૂપાંતરિત કરવા માટે Meladath 40,000 રૂપિયા સુધી ચાર્જ કરશે.
