100 વર્ષ સુધી રહેશે આ ઘર, શું તૂટેલા મકાનના લાકડા છે એનું રહસ્ય ?

Story

અમે હંમેશા પર્યાવરણની દ્રષ્ટિએ ખૂબ સભાન રહ્યા છીએ. તેથી 2017 માં જ્યારે અમે મેંગ્લોરમાં ઘર બનાવવાનું નક્કી કર્યું ત્યારે અમે વિચાર્યું કે ઘર એવું હોવું જોઈએ કે જેનાથી અમારી પ્રકૃતિને નુકસાન ખુબજ ઓછુ થાય. કારણ કે લોકો ઘરના બાંધકામ દરમિયાન અને તેમાં રહેતા સમયે પર્યાવરણને ઘણી વખત નુકસાન પહોંચાડે છે. જે અમે બિલકુલ ઈચ્છતા ન હતા, “માનસ મલ્લિક અને જેનેટ ડી કુન્હા કહે છે. આ દંપતીએ 2017 માં મેંગ્લોરમાં તેમના પરિવાર માટે પર્યાવરણને અનુકૂળ મકાન બનાવ્યું હતું અને 2018 માં તે પૂર્ણ થયું હતું, જેને ‘ઉર્વી’ નામ આપવામાં આવ્યું છે.

માનસ અને જેનેટ બંને આઇટી પ્રોફેશનલ્સ છે અને પ્રકૃતિપ્રેમી પણ છે. પ્રકૃતિ પ્રત્યેનો તેમનો પ્રેમ માત્ર તેમના ઘરમાં જ નહીં પરંતુ તેમની જીવનમાં પણ પ્રતિબિંબિત થાય છે. તેમણે કહ્યું, “અમારો પ્રયાસ અમારા જીવનને પ્લાસ્ટિક અને કેમિકલ મુક્ત બનાવવાનો છે. તેથી જ્યારે પણ અમે ઘર બનાવવાની વાત કરતા, અમે હંમેશા ઈચ્છતા હતા કે અમારું ઘર પણ ઈકો ફ્રેન્ડલી હોય. આપણી આસપાસ પહેલેથી જ ઘણું બધું છે જે પ્રકૃતિને નુકસાન પહોંચાડે છે. તેથી અમે અમારા તરફથી પ્રકૃતિ માટે અમારાથી થઈ શકે એવુ કંઈક કરવા માંગતા હતા.”

2600 ચોરસ ફૂટના વિસ્તારમાં બનેલું આ ઇકો ફ્રેન્ડલી હાઉસ જેનેટ અને માનસની અલગ વિચારધારાનું પરિણામ છે. જેનું નિર્માણ ‘બિલ્ડ એ હોમ’ કંપની દ્વારા કરવામાં આવેલુ છે. તેમના આર્કિટેક્ટ અભિજીતે જણાવ્યું હતું કે, “આ ઘરના નિર્માણ પાછળ લગભગ 57 લાખ રૂપિયાનો ખર્ચ થયો હતો. આમાં આર્કિટેક્ચર, ડિઝાઇન અને ઇલેક્ટ્રિકલ અને પ્લમ્બિંગ કામ સાથે બાંધકામ ખર્ચનો સમાવેશ થાય છે. આ ઉપરાત તેમા મકાનનો પ્લાન, સૌર પેનલ, તમામ જળ વ્યવસ્થા અને સરકારની તમામ મંજૂરી વગેરે જેવા તમામ ખર્ચ આમાં સામેલ છે. આનાથી આ મકાનમાં ઘણા સામાન્ય મકાનોના બાંધકામ કરતા વધારે ખર્ચ થયો હતો. પરંતુ જો આપણે આમ જોઈએ તો, આ ઘર સામાન્ય ઘરો કરતા ઘણું સારું છે અને તે 100 વર્ષનું આયુષ્ય ધરાવે છે.

માનસ અને જેનેટનું કહેવું છે કે મેંગલોર એક એવી જગ્યા છે જ્યાં ખૂબ ગરમી પણ પડે છે અને ખૂબ વરસાદ પણ પડે છે. તેને ધ્યાનમાં રાખીને આ ઘરનું નિર્માણ કરવામાં આવ્યું છે. જેથી ઉનાળાની ઋતુમાં ઘર ઠંડુ રહે અને આપણે AC ની જરૂર ન પડે. બીજું, વધારે વરસાદના કારણે ઘરમાં ભેજની સમસ્યા પણ ન હોવી જોઈએ. ઘર બનાવતી વખતે આ બંને વસ્તુઓને ધ્યાનમાં રાખીને કામ કરવામાં આવ્યું હતું. ઘરના નિર્માણમાં સિમેન્ટ અને સ્ટીલનો ઓછામાં ઓછો ઉપયોગ થતો હતો. ઇંટો, પ્લાસ્ટર, આરસીસી વગેરે જેવી સામાન્ય મકાનોના બાંધકામમાં વપરાતી સામગ્રીને ઇકો ફ્રેન્ડલી બનાવીને વાપરવામાં આવી હતી.

અમારા ઘરમાં ચાર બેડરૂમ, ચાર બાથરૂમ, એક મ્યુઝિક રૂમ, કિચન કમ ડાઇનિંગ એરિયા, બે લિવિંગ રૂમ અને આંગણું છે. અમારા આ ઘરની આશરે 40% વીજળી સૌર પેનલ દ્વારા પૂરી પાડવામાં આવે છે. ઉપરાંત, અમારા ઘરમાં એસી નથી અને ઉનાળામાં અંદરનું તાપમાન બહારના તાપમાન કરતા 5 ડિગ્રી ઓછું રહે છે. માનસ અને તેનો પુત્ર સંગીતનો શોખીન છે. એટલા માટે તેણે ઘરમાં ખાસ એક મ્યુઝિક રૂમ બનાવ્યો. તેનો આ રૂમ પણ ખાસ છે કારણ કે તેના ફ્લોર માટે વપરાતી વિનાઇલ સીડીનો ફરીથી ઉપયોગ કરવામાં આવ્યો છે.

માનસે કહ્યું, “અમે બંને કામના કારણે લંડનમાં રહીએ છીએ. પરંતુ અમારો પરિવાર આ ઘરમાં રહે છે. અમે બંને રજાના દિવસોમાં અહીં આવીએ છીએ. અમે બધા અહીં જ રહીએ છીએ. આ ઘરમાં રહેતી વખતે અમે બધા પ્રકૃતિની નજીક હોઈએ એવુ અનુભવીએ છીએ. ખાસ કરીને અમારા માતા -પિતા, જેઓ વૃદ્ધાવસ્થામાં છે. આ ઘર તેમના માટે ખૂબ જ આરામદાયક છે. કારણ કે અહીં કૃત્રિમ કંઈ નથી, તેથી તેઓ કંટાળી જતા નથી. ઘરની કુદરતી વાતાવરણ અને ઠંડક તેમને હંમેશા તાજગી અનુભવ કરાવે છે.

સૌ પ્રથમ, ચાલો ઇંટો વિશે વાત કરીએ તો. આ ઘરના નિર્માણમાં સામાન્ય ઇંટોને બદલે ‘પોરોથર્મ ઇંટો’ નો ઉપયોગ કરવામાં આવ્યો છે. પોરોથર્મ ઇંટો માટીની બનેલી ‘હોલો ઇંટો’ છે અને પરંપરાગત ઇંટો કરતાં હળવી હોય છે. આ પ્રકારની ઈંટોમાં હવાની અવરજવર થઈ શકે છે. ઉપરાંત મજબૂત પણ હોય છે અને ઉચ્ચ આગ પ્રતિકાર શક્તિ ધરાવે છે. ઘરની તમામ દિવાલો આ ઈંટોથી બનેલી છે અને તેના પર કોઈ સિમેન્ટ કે કેમીકલનું પ્લાસ્ટર નથી. એટલા માટે તમે કહી શકો છો કે આ ઘરની દિવાલો પણ શ્વાસ લે છે.

પોરોથર્મ ઇંટોનો ઉપયોગ કરવાને કારણે અમારું ઘર ખૂબ ઠંડુ રહે છે. અમારુ ઘર જે વિસ્તારમાં છે ત્યાં તમને બધા ઘરોમાં એક કે બે એસી મળશે પણ અમારા ઘરમાં એસી નથી. કેટલીકવાર પંખો ચલાવવાની પણ જરૂર હોતી નથી, ”માનસે કહ્યું. ઘરના ફ્લોર માટે, તેણે અથંગુડી ટાઇલ્સનો ઉપયોગ કર્યો છે અને કેટલાક ભાગમાં જુના લાકડાનો ઉપયોગ કર્યો છે. આ દંપતીનું કહેવું છે કે તેમના ઘરમાં બનેલા તમામ સ્ટીલ અને લાકડાના કામ માટે રિસાયકલ કરેલી સામગ્રીનો ઉપયોગ કર્યો છે.

તેના ઘરની બારીઓ, દરવાજા તમામ રિસાયકલ સામગ્રીથી બનેલા છે. “અમે જૂના મકાનોમાંથી લાકડાની બારીઓ અને દરવાજા ખરીદ્યા છે, જેને તોડી અને ફરીથી બનાવ્યા હતા, અને અમારા ઘરમાં તેનો ઉપયોગ કર્યો છે. અમે ઈચ્છતા ન હતા કે અમારા ઘર માટે એક પણ વૃક્ષ કાપવામાં આવે અને અમને ખુશી છે કે અમે તેમા સફળ પણ થયા. લોકો વિચારે છે કે રિસાયકલ કરેલી વસ્તુઓ બહુ મજબૂત નથી હોતી, પણ એવું નથી. લાકડું હોય કે સ્ટીલ, રિસાઈકલ થતા તેઓ કેટલા સમય સુધી ચાલશે તે જોવા માટે તેમની સંપૂર્ણ ચકાસણી કરવામાં આવે છે અને તે પછી જ તેનો ઉપયોગ થાય છે.

માનસ અને જેનેટ કહે છે કે ઘરમાં તાજી હવા અને કુદરતી પ્રકાશ કોને પસંદ નથી હોતો. તેથી, અમારુ ધ્યાન એ તરફ પણ હતું કે ઘરમાં મહત્તમ કુદરતી પ્રકાશ આવવો જોઈએ, જેથી તે દિવસ દરમિયાન ટ્યુબલાઇટ પર નિર્ભર ન રહે. આ માટે અમે જાળીનો ઉપયોગ કર્યો છે. ખાસ કરીને સીડીની નજીક અને આંગણામાં. કુદરતી પ્રકાશ માટે, તેણે એક કાચ ઘરની છત પર પણ લગાવ્યો છે, તેમાં પણ રિસાયકલ કરેલો કાચ વાપરવામાં આવેલો છે અને ઉપર વેન્ટિલેશન ટર્બાઇન પણ લગાવ્યું છે.

વેન્ટિલેશન ટર્બાઇન્સ ઘરની અંદરની બધી ગરમ હવા બહાર કાઢે છે અને બારીઓ અને જાળીઓમાંથી તાજી હવા આવતી રહે છે. જેના કારણે ઘરની અંદર ક્યારેય કોઈ ગૂંગળામણ કે ગરમી લાગતી નથી. જેનો તેમના માતા -પિતાને સૌથી વધુ ફાયદો થયો છે.

જેનેટના માતાપિતા, ઓલવીન અને સેલેસ્ટિન, આ ઘર વિશે કહે છે, “મોટા ભાગના ઘરો બંધ બોક્સ જેવા હોય છે, જેમાં ન તો તાજી હવા હોય છે અને ન તો કુદરતી પ્રકાશ. અમે પહેલા જે ઘરમાં રહેતા હતા તેમાંના મોટાભાગના ઘરમાં તાજી હવા અને પ્રકાશની સમસ્યા હતી. જેના કારણે ઘણી વખત અમે ગૂંગળામણ અનુભવતા હતા. પરંતુ આ ઘરમાં આવી કોઈ સમસ્યા નથી. “

તેમને લાગે છે કે મેંગલોર જેવી જગ્યાએ કુદરતી રીતે ઠંડુ અને આરામદાયક ઘર બનાવવું એ કોઈ સિદ્ધિથી ઓછું નથી. ઘરની છત માટે, તેણે ફિલર સ્લેબ તકનીકનો ઉપયોગ કર્યો છે. જેમાં માટીના વાસણોનો ઉપયોગ કરવામાં આવ્યો હતો. આ સિવાય તેમણે ‘ફોલ સિલિંગ’ માટે વાંસનો ઉપયોગ કર્યો છે. માનસ કહે છે કે આ વિસ્તારમાં ઘણો વરસાદ છે, તેથી તેઓએ છત પર પોલીકાર્બોનેટ શીટ લગાવી છે જેથી કોઈ પણ પ્રકારની ભીનાશ ન રહે.

મહત્તમ પાણી બચાવવા માટે, તેણે મેંગ્લોરમાં સૌથી વધુ ઉપલબ્ધ માધ્યમોનો ઉપયોગ કર્યો છે અને તે છે વરસાદ. આ વિસ્તારમાં ખૂબ વરસાદ પડે છે. એટલા માટે તેણે ઘરમાં 50 હજાર લિટર ક્ષમતાની ભૂગર્ભ ટાંકી બનાવી છે, જેમાં વરસાદનું પાણી એકત્રિત કરવામાં આવે છે. કેટલાક મહિનાઓ સુધી, તેમનો પરિવાર તેમની રોજિંદી પ્રવૃત્તિઓ માટે વરસાદી પાણીનો ઉપયોગ કરે છે. આ ઉપરાંત, ભૂગર્ભજળનું સ્તર વધારવામાં મદદરૂપ થવા માટે ઘરમાં નાના રિચાર્જ બોરીંગ પણ બનાવવામાં આવ્યા છે.

તેમના ઘરમાં ‘રો વોટર રિસાયક્લિંગ સિસ્ટમ’ પણ છે, જેનાથી તેમના ઘરમાં વપરાતા પાણીમાંથી લગભગ 50% ફિલ્ટર થાય છે અને ટોઇલેટ ફ્લશ માટે તેને ફરીથી ઉપયોગમાં લેવાય છે. બીજી બાજુ, જો આપણે વીજળીની વાત કરીએ, તો તેઓએ ઘરમાં સોલર પેનલ અને સોલર ગીઝર લગાવ્યા છે, જેના કારણે તેમનું વીજળી બિલ 40%સુધીની બચત થઈ રહી છે. તેણે વધુમાં જણાવ્યું કે તે સંપૂર્ણપણે કુદરતી જીવન જીવી રહ્યો છે. તેમનો પરિવાર કોઈપણ પ્રકારની પ્લાસ્ટિકની વસ્તુઓ કે ચામડાની વસ્તુઓનો ઉપયોગ કરતો નથી. દીકરા માટે પણ, તે ક્યારેય પ્લાસ્ટિકના રમકડાં લેતા નથી. રાસાયણિક ઉત્પાદનો પણ તેમના ઘરમાં ક્યારેય આવતા નથી. તે શક્ય તેટલી પ્રકૃતિ સાથે સુમેળ ભર્યું જીવન જીવવાનો શ્રેષ્ઠ પ્રયાસ કરે છે.

તે અન્ય લોકોને માત્ર એક જ સલાહ આપે છે કે એક પર્યાવરણને અનુકૂળ ઘર બનાવવું તમને શરૂવાતમાં મોંઘુ પડી શકે છે. પરંતુ જ્યારે તમે એવા ઘરમાં જીવવાનું શરૂ કરો છો, ત્યારે તમને ખ્યાલ આવે છે કે તમે માત્ર પર્યાવરણ બચાવતા નથી પણ તમારા પોતાના જીવનમાં ઓછો ખર્ચથી શાનદાર જીવન જીવી રહ્યા છો. આ મકાનોને સામાન્ય ઘરોની જેમ જ જાળવણીની જરૂર પડે છે અને રહેવા માટે શ્રેષ્ઠ છે.

Leave a Reply

Your email address will not be published. Required fields are marked *