Ranveer Singh “જયેશભાઈ જોરદાર” ફિલ્મમાં એક ગુજરાતી પાત્રમાં જોવા મળશે, જાણો કયારે થાય છે રિલીઝ

Bollywood

બોલિવૂડ અભિનેતા રણવીર સિંહ અત્યારે પોતાની અપકમિંગ ફિલ્મ જયેશભાઈ જોરદારને કારણે ઘણો ઉત્સુક છે. રણવીર સિંહની આ ફિલ્મ 13મી મેના રોજ રીલિઝ થવાની છે. આ ફિલ્મમાં રણવીર એક ગુજરાતી વ્યક્તિનું પાત્ર ભજવવાનો છે. આ ફિલ્મના માધ્યમથી રણવીર સિંહ સ્ક્રીન પર હિરોગીરીને એક નવા અંદાજમાં રજૂ કરશે. ફિલ્મ કેવી હશે, સ્ટોરીલાઈન શું હશે તે ફિલ્મ રિલીઝ થશે અથવા તો ટ્રેલર આવશે ત્યારે જ જાણવા મળશે. પરંતુ રણવીર સિંહે દાવો કર્યો છે કે આ ફિલ્મ તમામ દર્શકોને રડાવી દેશે.

રણવીર સિંહ તાજેતરમાં જ Femina Beautiful Indians 2022 ઈવેન્ડના રેડ કાર્પેટ પર જોવા મળ્યો હતો. અહીં તેને જ્યારે જયેશભાઈ જોરદાર વિશે પ્રશ્ન કરવામાં આવ્યો તો તેણે કહ્યું કે, આ ફિલ્મ એવી છે કે જો રડાવે નહીં તો પૈસા પાછા. ઉલ્લેખનીય છે કે જયેશભાઈ જોરદાર ફિલ્મમાં રણવીર સિંહનું પાત્ર સમાજના પિતૃસત્તાક માળખા વિરુદ્ધ અવાજ ઉઠાવશે.

થોડા સમય પહેલા જ્યારે રણવીર સિંહે જયેશભાઈ જોરદારની નવી રીલિઝ ડેટ જાહેર કરી હતી ત્યારે તેણે જણાવ્યુ હતું કે, તે આ ફિલ્મની સ્ટોરી સાંભળીને રડી પડ્યો હતો. રણવીરે કહ્યુ હતું કે, જ્યારે ડિરેક્ટર દિવ્યાંગ ઠક્કરે તેને સ્ક્રિપ્ટ વાંચીને સંભળાવી તો તે ખૂબ હસ્યો હતો. હસી હસીને તેના પેટમાં દુખાવો થઈ ગયો હતો, પરંતુ તે ખૂબ રડ્યો પણ હતો. રણવીરે જણાવ્યું કે ફિલ્મની સ્ટોરી તેના દિલ-દિમાગ પર હાવી થઈ ગઈ હતી.

રણવીર સિંહે અત્યાર સુધી પોતાની કારકિર્દીમાં અલગ અલગ પાત્રો ભજવ્યા છે. ફિલ્મ 83માં તેણે કપિલ દેવની ભૂમિકા ભજવી હતી અને લોકોને ચોંકાવી દીધા હતા. હવે તે જયેશભાઈ જોરદાન બનીને સૌના હોશ ઉડાવવા માટે તૈયાર છે. રણવીરે જણાવ્યુ હતું કે, તેણે આ પ્રકારનું પાત્ર હજી સુધી નથી ભજવ્યું. તે ઘણો ખુશ છે કે તેને આ ફિલ્મમાં અભિનય કરવાની તક મળી છે. જયેશભાઈ જોરદાર ફિલ્મથી સાઉથ ફિલ્મોની અભિનેત્રી શાલિની પાંડે બોલિવૂડમાં ડેબ્યુ કરવાની છે. ફિલ્મમાં રત્ના પાઠક શાહ અને બોમન ઈરાની પણ જોવા મળશે.

Leave a Reply

Your email address will not be published.